"Mənim səhvimdir və üzr istəyirəm" dedi, şirkətinin səhmləri bahalaşdı

Facebook-un qurucusu və  İcraçı direktoru Mark Zuckerberg, şirkətin məlumat sızıntısı qalmaqalı ilə bağlı ABŞ Senatında ifadə verib.


"Marja" xəbər verir ki,  Zuckerberg, "Facebook-dan informasiya sızmasını qarşısını almaq üçün kifayət qədər səy sərf etməmişik. Bu böyük səhvdir. Mənim səhvimdir və üzr istəyirəm" deyib.

Mütəxəssislər, mərkəzi ofisi Londonda yerləşən "Cambridge Analytica" adlı məlumat təhlili şirkətinin, 87 milyon Facebook istifadəçisinin hesablarından icazəsiz topladığı şəxsi məlumatları ABŞ və İngiltərədə həlledici siyasi seçkilərə təsir etmək üçün qanunsuz istifadə etdiyinə dair iddialar üçün Zuckerbergin Senatda uğurlu bir ifadə verdiyini bildirirlər.
 
Zuckerberg-in, məlumat sızıntısı qalmaqalı çərçivəsində özünün və şirkətinin səhvlərini qəbul etdiyinə diqqəti çəkən mütəxəssislər, bu cür böhranların yenidən baş verməməsi üçün Zuckerbergin hazırladığı planları ətraflı şəkildə açıqlamasının da investorlarda inam yaratdığı vurğulanır.

Mark Zuckerbergin ABŞ Senatında ifadə verməsindən sonra Facebook-un səhmlərinin qiyməti 165,94 dollara qədər qalxıb. Facebook səhmləri 4,5% bahalaşıb və şirkətin bazar dəyəri 477 milyard dollar təşkil edib.

Facebook-un səhminin qiyməti 1 Fevral tarixində 195,32 dollara çıxaraq rekord qırmışdı, ancaq daha sonra məlumat sızıntısı qalmaqalı səbəbindən şirkətin səhmlərində ucuzlaşma oldu.
 
Həmin tarixdən keçən cümə gününə qədər Facebook səhmləri 18,6 faiz ucuzlaşmışdı. Şirkətin bazar dəyəri də bu prosesdə 558 milyard dollardan 454 milyard dollara qədər geriləyərək 104 milyard dollar azalma göstərmişdi.

Mark Zuckerberg, bu gün isə ABŞ Nümayəndələr Palatasının Enerji və Ticarət Komitəsi qarşısında ifadə verəcək.