Düyü biznesindən 50 min manat qazanan fermer - Məhəmməd Şirinzadə

Hazırda Ağdaş rayonunun 59 kəndində 2 min 454 hektar çətlik sahəsi mövcuddur. Bu da ötən illə müqayisədə 2 dəfə çoxdur.

Bunu Ağdaşın Gürcuva kənd sakini, çəltikçiliklə məşğul olan fermer Məhəmməd Şirinzadə deyib.

Fermer bildirib ki, dövlət dəstəyindən bəhrələnən fermerlər və fərdi təsərrüfat sahibləri bu il əkin sahələrinin genişləndirilməsi ilə yanaşı məhsuldarlığın da iki dəfə artmasına nail olublar. Belə ki, hazırda rayonda çəltik yığımı davam edir və hər hektar sahədə məhsuldarlıq 30-35 sentinetdir. Ötən il isə çəltik sahələrində məhsuldarlıq 18,2 sentiner olub.

“Mülkiyyətimdə olan pay torpağında, eləcə də icarəyə götürdüyüm torpaq sahəsində ötənildəkindən 3 dəfə çox, yəni 60 hektar sahədə çəltik əkmişəm. Keçən il 20 hektar sahədən 36 ton çəltik topladım, yerli dəyirmanda istehsal etdiyim düyünü sərfəli qiymətə satmaqla 50 min manat gəlir əldə etdim. Dövlət qayğısından sonra mənim bu gəlirli sahəyə marağım daha da artıb. Dövlət tərəfindən bir hektar çəltik əkininə görə 90 manat subsidiya alıram. Gələn il 100 hektar sahədə çəltik yetişdirməyi qarşıma məqsəd qoymuşam.

Ağdaşda çəltikçiliyi inkişaf etdirməklə həm istifadəsiz qalan şoran torpaqların yuyularaq saflaşmasına, həm iqtisadi gəlirlərin artmasına, insanların ekoloji cəhətdən təmiz və sağlamlığımız üçün faydalı olan yerli düyü ilə qidalanmağa, həm də yeni iş yerlərinin açılmasına tövhə vermiş oluruq. Mən 60 hektar sahədə çəltiyin əkilməsi, becərilməsi və biçilməsi prosesinə 50-ə yaxın yerli sakin cəlb etmişəm.

Bildiyimiz ki, şoran torpaqlarda çəltikdən başqa heç bir bitki bitmir. Əgər Ağdaşın minlərlə hektar istifadəsiz qalmış şoran torpaqları çəltik əkininə cəlb edilərsə həm milyonlarla manat vəsait qazanmaq olar, həm də ixracdan asılılıq azalar, ölkə əhalisi yerli düyü ilə təmin edilər. Çəltik bol su olan ərazilərdə yaxşı yetişir. Hazırda rayonun 3 istiqamətində boş qalan şoran torpaqların çəltik əkininə cəlb edilməsi üçün su xətləri çəkilir. Çəltik əkilən torpaqlar getdikcə şorandan yuyularaq saflaşır və digər bitkilərin əkini üçün səmərəli olur”.

Fermer Lənkəranda keçirilən müşavirənin əhəmiyyətini çox yüksək qiymətləndirərək bildirib:

“Müşavirədə ölkə başçısının aidiyyati qurumların rəhbərlərinə verdiyi göstərişlər çəltikçiliyi inkişaf etdirməyimiz üçün lazımı köməkliklərin göstərilməsinə şərait yaradır. Biz də Ağdaşda çəltikçiliyin inkişafı üçün bütün gücümüzü sərf edəcəyik. İstəyərəm ki, Ağdaşda çəltiyin qurudulması üçün meydançalar, çəltik emalı və düyü istehsalı müəssisəsi, məhsulun saxlanılması anbarları inşa edilsin. Bu rayonda həm yeni iş yerlərinin açılmasına, həm də çəltik sahələrinin daha da genişləndirilməsinə təkan verər”.

 

© Azərtac