“Mastercard”ın Azərbaycan üzrə yeni baş direktoru təyin edilib

Bundan öncə “Mastercard” beynəlxalq ödəniş sistemində inkişafda olan Avropa bazarlarında məhsulların hazırlanması üzrə rəhbər köməkçisi vəzifəsini tutan Yiğit Çağlayan şirkətin Türkiyə və Azərbaycan üzrə baş direktoru təyin edilib.

Şirkətdən verilən məlumata görə, o, yeni vəzifəsində Türkiyə və Azərbaycan bazarlarında nağdsız cəmiyyətin inkişafı və rəqəmsallaşma üzrə məsul şəxs olacaq.

Karyerasına başladığı 2000-ci ildən etibarən Türkiyə və Böyük Britaniyada fərdi bankçılıq sahəsində kart, ticarət tərəfdaşları ilə iş və satış kimi fərqli departamentləri idarə edən Y.Çağlayan “Mastercard” şirkətində rəqəmsal ödəniş həlli olan “Masterpass”ın regionda yayılması və inkişafına rəhbərlik edib. O, ödənişlərin rəqəmsallaşdırılmasında həm Türkiyə, həm də sürətlə böyüyən Avropa bazarlarında ilkləri həyata keçirən komandalara liderlik edib, “conversational commerce” və tranzit sahələrdə son istifadəçiyə yönəlmiş innovativ layihələrdə məsul şəxs olub.

“Bizim üçün starteji əhəmiyyət daşıyan Türkiyə və Azərbaycan bazarlarını əhatə edən bu vəzifəni yerinə yetirərkən nağdsız cəmiyyət və rəqəmsallaşma məsələlərinə fokuslanmağa davam edəcəm”, - deyə o bildirib.

Y.Çağlayan Marmara Universitetində “Menecment” təhsilinin ardınca Yeditepe Universitetində MBA dərəcəsini alıb. “Mastercard” şirkətinin Türkiyə və Azərbaycan üzrə yeni baş direktoru Y.Çağlayan ondan əvvəl bu vəzifədə çalışan Yasemin Bediri əvəzləyib.

Mənbə: Apa.az